საქართველო, 12 მარტი, საქინფორმი. კოალიცია “ქართულ ოცნებაში” შემავალი რესპუბლიკური პარტია, მიუხედავად იმისა, რომ აბსოლუტურად არ ჰყავს ელექტორატი და პრაქტიკულად ოთხი წევრის პარტიაა (პარტიის თავმჯდომარე - შეთავსებით საქართველოს პარლამენტის თავმჯდომარე დავით უსუფაშვილი და პარტიის სამი ლიდერი - პარლამენტის წევრები: უსუფაშვილის მეუღლე თინა ხიდაშელი და ძმები ბერძენიშვილები - ლევანი და დავითი) - მმართველი პარტიაა საქართველოში. ქართველი რესპუბლიკელები, ბიძინა ივანიშვილის აღიარებით, მისთვის მისაბაძი მაგალითია და ის ისწრაფვის მათი, როგორც პოლიტიკოსების დონეს მიაღწიოს, ხოლო თავად რესპუბლიკური პარტია - მისი საყვარელი პარტია, პოლიტიკური პარტიისა და აკადემიზმის ეტალონი.

ამიტომ აშშ-ის ყველაზე საიმედო, ძველი და ნაცადი საყრდენი საქართველოში - რესპუბლიკური პარტია - ყოველთვის წარმოადგენს ქართული სახელმწიფოს პოზიციას მსოფლიო არენაზე და ეს პოზიცია პრაქტიკულად ყოველთვის ემთხვევა საქართველოს ექს მმართველი პარტია “ნაცმოძრაობის” და მისი ლიდერის - სააკაშვილის პოზიციას.

ასე მოხდა გუშინაც, როდესაც საქართველოს პარლამენტის დეპუტატმა, კოალიცია “ქართული ოცნების” წევრმა თინათინ ხიდაშელმა, რომელიც სტოკჰოლმში ევროპის საბჭოს საპარლამენტო ასამბლეის პოლიტიკური კომიტეტის სხდომაში მონაწილეობდა, როგორც ასამბლეის ლიბერალური ფრაქციის ვიცე-პრეზიდენტი, რუსეთის წინააღმდეგ ევროპის საბჭოს წესდებით გათვალისწინებული ყველა სანქციის გამოყენება მოითხოვა.