საქართველო, 12 მარტი, საქინფორმი. გუშინ, 11 მარტს, გადაცემაში „არჩევანი“ საუბრის მთავარი თემა სატელეფონო მოსმენები იყო, რამაც სტუმრებს შორის ცხარე დისკუსია გამოიწვია. გადაცემაში ჩაერთო ყოფილი მერი გიგი უგულავა, რომლის თქმითაც, მოსმენები წინა ხელისუფლების პრობლემაც იყო და ახალი ხელისუფლების პირობებშიც გრძელდება.

შს მინისტრის მოადგილე ლევან იზორიას აზრით, საჭიროა საქართველოს კანონმდებლობის ევროპული სტანდარტების შესაბამისად დახვეწა. არასამთავრობო ორგანიზაციებს კი მიაჩნიათ, რომ კომპანიები, რომელთა საშუალებით შსს სატელეფონო საუბრებს ფარულად იწერდა, უნდა გათავისუფლდნენ ამ ვალდებულებისგან.

„ეს პრობლემა მწვავედ დგას, გაათკეცებულია და ნუ ჩავდგებით სირაქლემას პოზიციაში, თითქოს დღეს ჩვენ თავისუფლად ვსუნთქავთ. გაცილებით უფრო ტოტალური მოსმენის სისტემაა აწყობილი და სამწუხაროდ, ეს ყველაფერი მოდის პირადად ბიძია ივანიშვილისგან“, - განაცხადა გიგი უგულავამ.

„მან და მისმა პოლიტიკურმა გუნდმა ამ 38 000 უკანონო ფაილისთვის, რომლებიც ადასტურებს, რომ სრულიად საქართველოს აკონტროლებდნენ, ბოდიში უნდა მოუხადოს საზოგადოებას. ისევ გვისმენენ - ეს სერიოზული ბრალდებაა, რომელიც ჩვენი სამართალდამცველების დისკრედიტაციისკენ არის მიმართული“, - განაცხადა საპასუხოდ იზორიამ.

უმცირესობის წევრი გიორგი ვაშაძის თქმით, ყველა კომპანიაში (მაგთი, ჯეოსელი,  ბილაინი) არის შავი ყუთები, რომლებსაც თავად შსს აკონტროლებს და ნებისმიერ დროს შეუძლია დაახლოებით 70 000 ადამიანს პარალელურ რეჟიმში მოუსმინოს.