სამართალი
ირმა ინაშვილი: „სააკაშვილის რეჟიმმა საქართველოში სისხლის გუბეები დააყენა“
საქართველო, 9 აპრილი, საქინფორმი. არ გამოვა ეს ე.წ. მაიდანი საქართველოში, არაფერი გამოუვათ „ნაციონალებს“, დესტაბილიზაციას ვერ შეძლებენ, - ამის შესახებ ჟურნალისტმა ირმა ინაშვილმა თეა სიჭინავას გადაცემა „პოლიტიკის დროში“ განაცხადა.
„ვინ არიან ეს ადამიანები? რა შუაშია საქართველოს დროშა და რა შუაშია ამ ფოტოზე უკან ასახული შინდისფერ-შავი, „უნა-უნსოს“, ცნობილი უკრაინული სამხედრო ორგანიზაციის დროშა? მინდა გითხრათ, რომ ეს ორგანიზაცია ითვლება ერთ-ერთ ფაშისტურ ორგანიზაციად უკრაინაში”, - აღნიშნა ინაშვილმა და იქვე დასძინა: „რატომ მიჰყავდათ ქართველი ახალგაზრდები „ნაციონალების“ ლიდერებს კიევში? ხომ გახსოვთ, ევრომაიდანზე დაიღუპა დავით ყიფიანი. ვინ არის ამაზე პასუხისმგებელი? რატომ უნდა ეწირებოდნენ ქართველები უცხო ქვეყანაში რაღაც გაუგებარ მოვლენებს? დიახ, „ნაციონალური მოძრაობა“ წირავს ქართველ ახალგაზრდებს. მინდა გითხრათ, რომ ნუ დაიღუპავთ თავს, ნუ ამაყობთ იმით, რომ „დღეს მეც მიშა ვარ“, სააკაშვილის რეჟიმმა საქართველოში სისხლის გუბეები დააყენა და მინდა მოგიწოდოთ - გაემიჯნეთ მათ“.
ჟურნალისტის თქმით, პრორუსულ ორგანიზაციებსაც „ნაციონალური მოძრაობა” ქმნის და აფინანსებს.
„რატომ ვერ ვხედავდით ამ პუტინის „ფანებს“, ახლა, ამ ბოლო დროს რომ გამოჩნდნენ? ამ პატარა პრორუსულ წვრილ–წვრილ ორგანიზაციებს სწორედ „ნაციონალური მოძრაობა“ ქმნის და აფინანსებს, რომელთა გამოსვლებსაც შემდგომ „თავისუფალი ზონისა“ და სხვა ორგანიზაციის წარმომადგენლები გააპროტესტებენ და დაუპირისპირდებიან“, – განაცხადა ირმა ინაშვილმა.
