საქართველო, 5 ივნისი, საქინფორმი. გუშინ, 2014 წლის 4 ივნისს, გაიმართა პრემიერ-მინისტრ ირაკლი ღარიბაშვილის პრესკონფერენცია „ექსპო-ჯორჯიაში“, რომელმაც სამ საათზე მეტხანს გასტანა.

“ბლუმბერგის” ჟურნალისტის კითხვაზე, თუ კონკრეტულად რა გაუმჯობესდა რუსეთ-საქართველოს ურთიერთობაში და ხომ არ დადგა  საქართველოსა და რუსეთის ხელისუფლების პირველი პირების პირისპირ შეხვედრის დრო, პრემიერმა უპასუხა:

„ჩვენი კონსტრუქციული პოლიტიკის შედეგია ის, რომ მოხდა რეალურად დეესკალაცია იმ დაძაბულობის, რომელიც წლების განმავლობაში იყო. მინიმუმამდე დავწიეთ ის ტემპერატურა და დაძაბულობა, რომელიც ორ ქვეყანას შორის არსებობდა. რეალურად დაიწყო ხალხთა შორის ნდობის აღდგენის პროცესი, გავაუმჯობესეთ კულტურული ურთიერთობები და აღვადგინეთ სავაჭრო-ეკონომიკური ურთიერთობა. ამ ყველაფერს მოჰყვა რეალური შედეგები, მოიხსნა ემბარგო ღვინოზე, მინერალურ წყალზე, სხვადასხვა პროდუქტზე. ეს რეალური შედეგი და სარგებლის მომტანია თითოეული მოქალაქისთვის და ქვეყნისთვის. აი, ეს არის ჩამონათვალი, რა გაუმჯობესდა რუსეთთან ურთიერთობაში", - განაცხადა პრემიერმა და დასძინა, რომ „რეალური შედეგია რუსეთის ხელისუფლების განცხადება, რომ არ აპირებს, ჩაერიოს საქართველოს ევროკავშირთან ასოცირების შეთანხმების ხელმოწერის პროცესში“ და რომ „მათგანაც ვხედავთ კონსტრუქციულ პოზიტიურ ნაბიჯებს“.