საქართველო. 15 ივნისი, საქინფორმი. მარტვილის რაიონის სოფელ დოშაყეში არსებული  უბნიდან ნიღბიანმა პირებმა ბიულეტენები გაიტაცეს. საოლქო საარჩევნო კომისიის თავმჯდომარის გრიგოლ ბართაიას ინფორმაციით, დილის 06.00 საათზე უბანს შეიარაღებული პირები დაესხნენ თავს და საარჩევნო დოკუმენტაცია გაიტაცეს.
შს სამინისტროს ინფორმაციით, სამეგრელოში, მარტვილის მე-16 საარჩევნო უბნიდან გატაცებული საარჩევნო დოკუმენტაცია უბნიდან 200 მეტრში იპოვეს.

შსს-ს საზოგადოებასთან ურთიერთობის სამსახურის უფროსის, ნინო გიორგობიანის ინფორმაციით, ნაპოვნი ბიულეტენები დალუქული და ხელუხლებელი იყო და დაუბრუნდა საარჩევნო უბანს.

ამასთან, ცნობილი ხდება მეორე ფაქტის შესახებ, ზუგდიდის #32 და #92 საარჩევნო უბნებზე გარდაცვლილი გოგიტა აბულაძის ახლობლები კენჭისყრის ჩაშლას ცდილობენ.

უბნიდან გატაცებული იქნა საარჩევნო დოკუმენტაცია (ბიულეტენები, ბეჭდები). ამ დროისათვის დადგენილია გატაცებული მასალის ადგილმდებარეობა. მიმდინარეობს გამოძიება. კენჭისყრა კი განახლდა.

დილითვე კიდევ ერთი სამწუხარო ცნობა გავრცელდა. ცენტრალური საარჩევნო კომისიის ინფორმაციით,  ახალქალაქის მე-4 უბანზე უბნის გახსნამდე გულის შეტევით გარდაიცვალა საუბნო კომისიის წევრი ლევონ საპონჯიანი.

საარჩევნო ადმინისტრაცია გარდაცვლილის ოჯახს უსამძიმრებს.