საზოგადოება
კახი კალაძე: „კოალიცია „ქართული ოცნების“ კანდიდატები ლიდერობენ მთელი ქვეყნის მასშტაბით, მათ შორის იმ ქალაქებსა და მუნიციპალიტეტებში, სადაც მეორე ტური დაინიშნა!“
საქართველო, 17 ივნისი, საქინფორმი.
„პრაქტიკულად ყველა საკრებულოში აბსოლუტურ უმრავლესობას ჩვენი წარმომადგენლები შეადგენენ. საერთო ჯამში, მთელი ქვეყნის მასშტაბით ასარჩევი 1049 მაჟორიტარული მანდატიდან „ქართულმა ოცნებამ“ 811 დეპუტატი გაიყვანა, რაც საერთო რაოდენობის 77,31%-ს შეადგენს.
არჩეული მაჟორიტარებიდან მეორე ადგილზე გავიდნენ საინიციატივო ჯგუფების მიერ წარმოდგენილი კანდიდატები, რომელთა მთლიანი რაოდენობა 128 ადამიანია.
ჯამში, ოპოზიციური პარტიების არჩეული მაჟორიტარების რაოდენობა შეადგენს 238-ს, საიდანაც მხოლოდ 64-ია მთავარ ოპოზიციურ ძალაზე პრეტენზიის მქონე „ნაციონალური მოძრაობის“ დეპუტატი.
მაჟორიტარული და სიითი შემადგენლობის ჩათვლით, ქვეყნის მასშტაბით, „ქართულმა ოცნებამ“ 1400-მდე მანდატი მოიპოვა, რაც რამდენჯერმე აღემატება სხვა პოლიტიკური ძალების წარმომადგენელთა მანდატების ჯამურ რაოდენობას.დემოკრატიულობის მაღალი ხარისხის მაჩვენებლია ის ფაქტი, რომ არჩევნების მეორე ტურში ლიდერ პოლიტიკურ ძალას 6 ოპოზიციური პარტია დაუპირისპირდება“, - აღნიშნა, კერძოდ, კოალიცია „ქართული ოცნების“ გენერალურმა მდივანმა დღეს ჩატარებულ ბრიფინგზე.
