აქტუალური
ჟურნალისტ ზაზა დავითაიას ცემის ფაქტზე "თავისუფალი ზონის" წევრი დააკავეს
საქართველო, 2 ოქტომბერი, საქინფორმი. შსს ვაკე-საბურთალოს სამმართველოს თანამშრომლებმა ჯგუფურად ჩადენილი ხულიგნობის ფაქტზე "თავისუფალი ზონის" წევრი ფარნაოზ ჭ. დააკავეს.
გამოძიების ინფორმაციით, ბრალდებულმა თანმხლებ პირებთან ერთად, თბილისში, იოსებიძის და ბულაჩაურის ქუჩების გადაკვეთაზე, ურთიერთშელაპარაკებისას, გაზეთ "ასავალ-დასავალის" ჟურნალისტი ზაზა დავითაია სცემა და შემთხვევის ადგილიდან მიიმალა.
საპატრულო პოლიციის ეკიპაჟი ინციდენტის ადგილზე გამოცხადდა ,სადაც მას ფიზიკური და სიტყვიერი შეურაცხყოფა მიაყენა მოქალაქე დავით გ-მ. აღნიშნული პირი პოლიციელისთვის წინააღმდეგობის გაწევისა და სხვისი ნივთის განზრახ დაზიანებისთვის დააკავეს.
რაც შეეხება ზაზა დავითაის ცემაში ბრალდებულ ფარნაოზ ჭ-ს, ის სამართალდამცველებმა მომხდარიდან რამდენიმე საათში დააკავეს. დანაშაულში ბრალდებული სხვა პირების დადგენა-დაკავების მიზნით ამ დრომდე მიმდინარეობს ოპერატიული ღონისძიებები.
