აქტუალური
საქართველოში ორდღიანი ოფიციალური ვიზიტით სომხეთის რესპუბლიკის თავდაცვის მინისტრის პირველი მოადგილე იმყოფებოდა
საქართველო, 19 იანვარი, საქინფორმი. გასულ შაბათ-კვირას საქართველოს თავდაცვის მინისტრის მოადგილე ლევან ღირსიაშვილმა სომხეთის რესპუბლიკის თავდაცვის მინისტრის პირველი მოადგილე დავით ტონოიანი, სომხეთის შეიარაღებული ძალების გენერალური შტაბის უფროსის პირველი მოადგილე, გენერალ-ლეიტენანტი ენრიკო აპრიამოვი, დელეგაციის სხვა წევრებთან ერთად, თავდაცვის სამინისტროში მიიღო.
შეხვედრაზე ორი ქვეყნის თავდაცვის უწყების წარმომადგენლებმა სამხედრო სფეროში ორმხრივი თანამშრომლობისა და სამომავლო გეგმების შესახებ ისაუბრეს. მეზობელი ქვეყნების თავდაცვის სამინისტროებს შორის ორმხრივი თანამშრომლობის გეგმას მოეწერა ხელი.
მოგვიანებით საქართველოს ეროვნულ თავდაცვის აკადემიაში სომხეთის რესპუბლიკის თავდაცვის მინისტრის პირველმა მოადგილე დავით ტონოიანმა იუნკერებს წაუკითხა ლექცია თემაზე - „რეგიონული უსაფრთხოება სომხეთის გადასახედიდან“.
