საქართველო, 16 ივლისი, საქინფორმი. ამერიკის შეერთებული შტატების პრეზიდენტმა ბარაკ ობამამ გაზეთ The New York Times- თან ინტერვიუში განაცხადა, რომ ირანის ბირთვულ პროგრამაზე წარმოებულ საერთაშორისო მოლაპარაკებებში, რუსეთის პოზიცია მისთვის მოულოდნელი იყო. ამერიკული გამოცემის ჟურნალისტმა შეერთებული შტატების პირველ პირს  რუსეთის როლის შესახებ ჰკითხა. რაზეც პრეზიდენტმა უპასუხა, რომ რუსეთის გარეშე, ირანის ბირთვულ პროგრამაზე მოლაპარაკება არ შედგებოდა.

"რუსეთმა დიდი დახმარება გაწია ამ პროცესში. თქვენთან გულწრფელი ვიქნები და გეტყვით, უკრაინის საკითხთან დაკავშირებით, რუსეთთან გაჩენილი უთანხმოებების გამო, არ ვიყავი დარწმუნებული, რომ რუსეთისგან მხარდაჭერა იქნებოდა. ჩვენ ვერ მივაღწევდით შეთანხმებას, თუ არ იქნებოდა რუსეთის მზადყოფნა, მხარი დაეჭირა ჩვენთვის და "ექვსეულის" სხვა წევრებისთვის", - განაცხადა აშშ-ის ლიდერმა.

ამასთან, აშშ-ის პრეზიდენტმა განაცხადა, რომ რამდენიმე კვირის წინ მასსა და ვლადიმერ პუტინს შორის სატელეფონო საუბარი შედგა.

"მე ძალიან გახარებული ვიყავი, როდესაც რამდენიმე კვირის წინ პუტინმა დამირეკა და სირიაში არსებულ ვითარებაზე საუბარი წამოიწყო. ვფიქრობ, მათ ესმით, რომ ასადის რეჟიმი კონტროლს კარგავს სირიის ძალიან დიდ ნაწილზე და სუნიტი ჯიჰადისტების რეჟიმის დამხობის პერსპექტივები არც ისე რეალურია, ეს საფრთხე ყოველდღიურად სულ უფრო და უფრო იზრდება. ეს კი საშუალებას გვაძლევს, რომ დავიწყოთ სერიოზული საუბარი მათთან", - განაცხადა ობამამ.