საზოგადოება
ბუდა საქართველოში

buda-bariროგორც საქინფორმმა უკვე აცნობა მკითხველს, თბილისის ისტორიულ ცენტრში, საპატრიარქოს, სამებისა და სიონის ტაძრების წინ, რიყეზე, ბუდას ქანდაკება დაიდგმება, რომლის გარშემოც ბარი იქნება განთავსებული. ახალი ინფორმაციით, ამ ბარის საქართველოში აშენების იდეა ფეხბურთელ კახი კალაძეს ეკუთვნის, რომელსაც ე.წ. ბუდა-ბარი უკრაინაში აქვს. საქინფორმის კორესპონდენტი ფეხბურთელის მეუღლეს, მოდელ ანუკა არეშიძეს დაუკავშირდა, რომელმაც ეს ფაქტი უარყო: „კახის აქვს ბუდა-ბარი კიევში, მაგრამ საქართველოში არც კი უფიქრია მსგავსი ბარის გაკეთება, ალბათ, ეს მორიგი ჭორია“.

ჩვენთვის, ასევე, ცნობილი გახდა, რომ მშენებლობას კომპანია „საქართველოს ინდუსტრიული ჯგუფი“ უხელმძღვანელებს, საქინფორმის ჟურნალისტი ინდუსტრიული ჯგუფის დირექტორთან დაკავშირებას ცდილობდა, მაგრამ კომპანიაში უთხრეს, რომ იგი ამჟამად საქართველოში არ იმყოფება და ერთი კვირა არც ჩამოვა. კომპანიის კანცელარიის განყოფილების თანამშრომელმა, რომელმაც სახელი და გვარი სატელოფონო საუბრისას არ დაასახელა, ასეთი პასუხი გაგვცა:

“ ჩვენი კომპანია ამ პროექტს არ ხელმძღვანელობს, დირექტორი საქართველოში არ არის, თორემ ის უფრო ზუსტ პასუხს გაგცემდათ“.

და თქვენ ზუსტად არ იცით?

„ მე ვიცი, რომ არ ხელმძღვანელობს, მაგრამ შეიძლება რაღაც არის, რაც მე ჯერ არ ვიცი, ამიტომ პასუხისგან თავს შევიკავებ, რადგან ზუსტი ინფორმაცია არ მაქვს. ჩვენი დირექტორი ერთ კვირაში იქნება და ის ბევრად კომპეტენტურად გიპასუხებთ”.