საქართველო, 28 ოქტომბერი, საქინფორმი. თავდაცვისა და უსაფრთხოების ფორუმის მეორე დღეს პანელის „ჰიბრიდული ომი და მისი გავლენა ნატოს წევრ და პარტნიორ ქვეყნებზე" მომხსენებლები იყვნენ: საქართველოს შეიარაღებული ძალების გენერალური შტაბის უფროსის მოადგილე, პოლკოვნიკი ომარ ბეგოიძე, ჩეხეთის საგარეო საქმეთა მინისტრის მოადგილე, პოლიტიკური დირექტორი ივან ჟესტრაბი, ატლანტიკური საბჭოს მკვლევარი არიელ კოენი და სხვ.

პოლკოვნიკმა ომარ ბეგოიძემ საქართველოში რუსეთის მხრიდან ჰიბრიდული ომის გავლენაზე გაამახვილა ყურადღება. მან მაგალითისთვის 2008 წლის აგვისტოს ომი მოიყვანა და აღნიშნა, რომ ამ კონფლიქტში ჰიბრიდულ ომს უდიდესი როლი ეკავა: „რუსეთმა მეთოდები საქართველოსთან დახვეწა და შემდეგ უფრო ეფექტურად უკრაინაში გამოიყენა; სწორედ რუსეთის აგრესია უკრაინაში, აფხაზეთსა და სამაჩაბლოში ჰიბრიდული ომის ნათელი მაგალითებია“, - აღნიშნა მან.

დოქტორ არიელ კოენმა საქართველოს ჰიბრიდული ომის მსხვერპლი უწოდა: „ჰიბრიდული ომის საფრთხე ისტორიული გამოწვევაა, რომელიც ათასობით წელია არსებობს, როდესაც ხშირ შემთხვევაში დაძაბულობა სრულმასშტაბიან ომში არ გადაიზრდება. საჭიროა ვისწავლოთ, თუ როგორ გავუმკლავდეთ მსგავს კრიზისებს. ფინანსთა სამინისტრო, იუსტიციის სამინისტრო, პოლიცია და უსაფრთხოების სამსახური შეიარაღებულ ძალებთან ერთად უნდა შეებრძოლონ ამ საფრთხეს".