უცხოეთი
ევროკავშირთან უვიზო რეჟიმს საქართველო უკრაინაზე ადრე მიიღებს
საქართველო, 9 ნოემბერი, საქინფორმი. უკრაინის რადას ევროინტეგრაციის საკითხთა კომიტეტის თავმჯდომარე ირინა გერაშენკოს განცხადებით, ევროკავშირთან უვიზო რეჟიმს საქართველო გაცილებით ადრე მიიღებს, ვიდრე უკრაინა. ამის შესახებ დეპუტატი სოციალურ ქსელ "ფეისბუქის" პირად გვერდზე წერს.
"ექსპერტების აზრი უვიზო რეჟიმის პერსპექტივის შესახებ შემდეგია: კონსერვატიულმა მოლდოვამ და საქართველომ ყველა აუცილებელი კანონი მიიღო. როგორც ჩანს, ქართველები უვიზო რეჟიმს უფრო სწრაფად მიიღებენ, ვიდრე უკრაინელები და ამაში დამნაშავე იქნება მხოლოდ უკრაინის ხელისუფლება და უპირველეს ყოვლისა უმაღლესი რადა", - წერს გერაშენკო.
რამდენიმე დღის წინ, ქვეყნის პრეზიდენტმა პეტრო პოროშენკომ განაცხადა, რომ უმაღლესი რადას დეპუტატები პასუხისმგებლობით უნდა მოეკიდონ პარლამენტში კანონპროექტების პაკეტებს, რომელთა მიღებაზეა დამოკიდებული უკრაინისთვის ვიზალიბერალიზაციის საკითხის დადებითად გადაწყვეტა ევროკავშირის მხრიდან.
