საქართველო, 24 თებერვალი, საქინფორმი. 22 თებერვალს „პირველის“ პრესკლუბში ახალგაზრდა ფინანსისტთა და ბიზნესმენთა ასოციაცია „აფბამ“ ბრიფინგი გამართა. ორგანიზაციის ანალიტიკოსმა პაატა ბაირახტარმა საქართველოს საგარეო ვაჭრობის მონაცემები შეაფასა, რომელთა მიხედვითაც 2016 წლის იანვარში ექსპორტი - 22%-ით, ხოლო იმპორტი 25%-ით არის შემცირებული.

 „ექსპორტის კლებადი ტენდენციის მიუხედავად, აბსოლუტურ მაჩვენებლებში ევროკავშირის ქვეყნებთან  ექსპორტი 2015 წელს 3,45%-ით (22,341 მლნ) არის გაზრდილი 2014 წლის ანალოგიურ მაჩვენებელთან შედარებით, რაც მეტწილად დაკავშირებულია ევროკავშირთან ღრმა და ყოვლისმომცველი თავისუფალი სავაჭრო რეჟიმის მოქმედებასთან“, – აცხადებს ანალიტიკოსი.

 „გასათვალისწინებელია ის გარემოებაც, რომ რეგიონში არსებული ქვეყნების ეროვნული ვალუტები, მძიმე ეკონომიკური მდგომარეობის გამო, დოლართან მიმართებაში მნიშვნელოვნად გაუფასურდა, მაგალითად, 50%-ით გაუფასურდა აზერბაიჯანული მანათი, თითქმის 66%-ით გაუფასურდა რუსული რუბლი და 20%-ზე მეტით თურქული ლირა. გამომდინარე იქიდან, რომ ეს ქვეყნები საქართველოს ძირითადი სავაჭრო პარტნიორები არიან, ამან უარყოფითი გავლენა იქონია საქართველოდან ექსპორტის მოცულობაზე“, – განაცხადა პაატა ბაირახტარმა.