მესტიაში ახალი სათხილამურო კურორტის სეზონის გახსნა თავდაპირველად 21 დეკემბერს იყო დაგეგმილი, შემდეგ 24 რიცხვამდე გადადეს, მაგრამ იტალიური კომპანია „ლაიტნერის“ ინფორმაციით, რომელიც სარემონტო სამუშაოებს აწარმოებს, ეს ვადაც საეჭვო ხდება, მიზეზი ბაგირების დამჭერი ბოძების შებრუნებით დამაგრებაა, რის გამოც სიმძიმის ცენტრი ჰაერში მოექცა, როგორც ჩანს, სვანმა მუშებმა იტალიელებს ვერ გაუგეს. კომპანია „ლაიტნერი“ ამ ხარვეზს ქართველებს აბრალებს, ხოლო ქართული მხარის წარმომადგენელი, სამეგრელო-ზემო სვანეთის პრეზიდენტის რწმუნებული ზაზა გოროზია კი მნიშვნელოვანი ხარვეზის არსებობას საერთოდ უარყოფს.

„მე მინდა გითხრათ პირდაპირ, რომ ყველა პრობლემა, რომელიც ამ საბაგირო ხაზთან იყო დაკავშირებული უკვე აღმოფხვრილია, საცდელი ასვლაც უკვე განხორციელებულია და ის ინფორმაცია, რომ თითქოს სიმძიმის ცენტრი ჰაერში მოექცა, სრული სიცრუეა. აქ, უბრალოდ, მუშაობის პროცესში „გაიკების“ ცდომილება იყო, სეზონი კი 24-ში გაიხსნება“.

სეზონის საზეიმოდ გახსნაში ეჭვი ქართველ ხალხს არ ეპარება, რადგან ჩვენმა პრეზიდენტმა უკვე მიგვაჩვია შადრევნების, ხიდების, სტადიონებისა და სპოტული კომპლექსების პომპეზურად გახსნებს, მაგრამ უნდა მივენდოთ თუ არა საბაგიროს, რომელზეც ის იტალიელი მშენებლები, რომლებიც დასახმარებლად მათ თავად მოიწვიეს, ამბობენ, რომ ჯერ არ არის მზად ასვლის განსახორციელებლად, ეს არის მთავარი საკითხი, წითელი ლენტი, ფეიერვერკები, შამპანურის ფუჟერები და თანაგუნდელების აღფრთოვანებული ტაში კი მოიცდის.