საზოგადოება
ამერიკანიზაცია თბილისში

tbilisis_ruqaპრეზიდენტის ინიციატივით, ნავთლუღში, ბაღდათის ქუჩისთვის რიჩარდ ჰოლბრუკის სახელის მინიჭებაზე დღეს თბილისის საკრებულოს სახელდებისა და სიმბოლიკის კომისიის სხდომაზე იმსჯელებენ.

რიჩარდ ჰოლბრუკი ამერიკელი დიპლომატი იყო, რომელიც 69 წლის ასაკში გარდაიცვალა. ის   ავღანეთსა და პაკისტანში აშშ-ის პრეზიდენტის სპეციალური წარმომადგენელი იყო. რიჩარდ ჰოლბრუკი აშშ-ის საგარეო პოლიტიკის ერთ-ერთ ყველაზე თვალასაჩინო ფიგურად ითვლებოდა. მას 1970-იან წლებში აშშ-ის სახელმწიფო მდივნის მოადგილის თანამდებობაც ეკავა, შემდგომში კი ბალკანეთში სპეციალურ წარმომადგენლად მუშაობდა. იყო აშშ-ის ელჩი გაეროსა და გერმანიაში.

პატივს ვცემთ და ვაღიარებთ ამ ადამიანსა და მის ღვაწლს, მაგრამ ამერიკის ყოფილი პრეზიდენტის - ჯორჯ ბუშის გზატკეცილი, ჰეიდარ ალიევის სახელობის სანაპირო და ლეხ კაჩინსკის ქუჩა უკვე ხომ არსებობს ჩვენს დედაქალაქში? ნუთუ ყველა ქართველი მოღვაწე უკვე დავაფასეთ და ახლა უცხოელებზე გადავედით?

ამ კითხვაზე თბილისის საკრებულოში პასუხი ვერ მივიღეთ. არადა, საინფორმაციო სამსახურმა 09-მ სწორედ მასთან გადაგვამისამართა, რადგან თბილისის ქუჩებს სწორედ ის განყოფილება ხელმძღვანელობს, რომლის ნომერი 93 36 14-ია,მაგრამ, როგორც ჩანს, იქ მხოლოდ ფორმალურად ასრულებენ თავიანთ მოვალეობას.

მერიაში პრეტენზიული პასუხი გაგვცეს, რომ ეს საკრებულოს საქმეა და ტყუილად ვაწუხებდით ამ საკითხზე მერიის თანამშრომელს, მათ საკრებულოს მეორე ნომერიც მოგვცეს - 99 54 26, სადაც ტელეფონს არავინ პასუხობს.