სამართალი
მარტში ისრაელში საქართველოს 129 მოქალაქე არ შეუშვეს

 საქართველო, 22 აპრილი, საქინფორმი. საქართველოს შინაგან საქმეთა სამინისტროს მონაცემებით, მიმდინარე წლის მარტში ისრაელში საქართველოს 996 მოქალაქე გაემგზავრა, საიდანაც ქვეყანაში 129 არ შეუშვეს.

შედარებისთვის, თებერვალში ისრაელში 1021 მოქალაქე გაემგზავრა და საზღვარი 130-მა ვერ გადაკვეთა; იანვარში 1320 გამგზავრება და 141 უარის ფაქტი დაფიქსირდა.

შსს-ს ინფორმაციით, მარტში საქართველოს 28 მოქალაქე უკრაინაში არ შეუშვეს, 20 – თურქეთში, 11 – ბელარუსში, 4 – რუსეთში, 2 – ყატარში, 5 – სხვა ქვეყნებში.

ისრაელში საქართველოს მოქალაქეთა არშეშვების ერთ-ერთი ბოლო ფაქტი ანსამბლ „გორდას“ 17-წევრიან ჯგუფს უკავშირდება. ისრაელის სასაზღვრო სამსახურისთვის საეჭვო გახდა, რომ საბავშვო ფესტივალზე მხოლოდ რამდენიმე ბავშვი მიემგზავრებოდა, დანარჩენები კი 25 წლის ზემოთ ასაკის პირები იყვნენ.