გამოცემა „ნიუ იორკ პოსტი“ ექსკლუზიურ მასალას აქვეყნებს საქართველოს მოქალაქე ოლეგ შარიფოვის შესახებ, რომელმაც დიპლომატიური იმუნიტეტი გამოიყენა, რათა თავი აერიდებინა გამოძიებისთვის მას შემდეგ, რაც ასობით დოლარის ღირებულების საქონელი მოიპარა მაღაზიიდან – „XXI საუკუნე“. ინფორმაციას გამოცემა პოლიციის წყაროზე დაყრდნობით ავრცელებს, რომლის მიხედვითაც, 33 წლის ოლეგ შარიფოვმა მაღაზიაში 34.97$ ღირებულების საქონელზე ფასი 10.97$–ით შეცვალა და ნაკლები გადაიხადა. მას თვალს მაღაზიის უსაფრთხოების სამსახურის თანამშრომელი ადევნებდა, რომელმაც მოგვიანებით ის დააკავა. ჩანთაში შარიფოვს კიდევ აღმოუჩინეს მოპარული საქონელი, რომლის საერთო ღურებულება 443.62$ იყო.

„მაღაზიის ადმინისტრაცია პოლიციას დაუკავშირდა, რომელმაც აღმოაჩინა, რომ შარიფოვი ქალაქში იმყოფებოდა საქართველოს ოფიციალურ დელეგაციასთან ერთად, რომელშიც შედიოდა სახელმწიფოს მეთაურიც, – განუცხადა წყარომ პოლიციიდან „ნიუ იორკ პოსტს“. – ასე რომ, იმის მიუხედავად, რომ შარიფოვი ტექნიკურად არ არის დიპლომატი, მას აღმოაჩნდა სრული დიპლომატიური იმუნიტეტი“.

აშშ–ს პოლიციამ აღარ დააპატიმრა შარიფოვი. გამოცემის ცნობით, ვაშინგტონში საქართველოს საელჩოს განცხადებით, შარიფოვი საქართველოს მოქალაქეა და საქმესთან დაკავშირებით გამოძიება მიმდინარეობს. ამ თემასთან დაკავშირებით კომენტარს არ აკეთებენ არც პრეზიდენტის ადმინისტრაციაში, არც საგარეო საქმეთა სამინისტროში.