საქართველო, 24 თებერვალი, საქინფორმი. რუსეთის მხრიდან საქართველოს წინააღმდეგ განხორციელებულ ჰაკერულ თავდასხმას აშშ-ში რუსეთის საელჩო ეხმაურება. დიპლომატიური უწყების ოფიციალურ ფეისბუქგვერდზე აღნიშნულია, რომ ისინი იმედგაცრუებული არიან, თუმცა რუსეთის წინააღმდეგ მორიგი ბრალდება მათ არ გაჰკვირვებიათ.

„სამწუხაროა, რომ ამერიკელი დიპლომატები, რომლებიც ოდესღაც მაღალი პროფესიონალიზმით გამოირჩეოდნენ, სულ უფრო ხშირად მიმართავენ ბულვარული ჟურნალების მეთოდებს. მათთვის მთავარი სენსაციაა. სამწუხაროა, ამერიკის შეერთებული შტატები სულ უფრო იშვიათად იხსენებს, რომ არსებობს საერთაშორისო ნორმები, რომლის საფუძველზეც სუვერენული სახელმწიფოს წინააღმდეგ ბრალდებას აუცილებელია თან ახლდეს მტკიცებულებები“, – აღნიშნულია განცხადებაში.

აშშ-ში რუსეთის საელჩო ასევე აღნიშნავს, რომ ამერიკისა და დასავლეთისთვის ახლა უპირატესია საკმარისი რაოდენობის მოკავშირე და პარტნიორი სახელმწიფოების მხარდაჭერა, რათა რაიმე მოვლენა საბოლოო ჭეშმარიტებად შეაფასონ.

განცხადებაში აღნიშნულია, რომ რუსეთი მზად არის, ყველა აქტუალურ საერთაშორისო საკითხთან დაკავშირებით დიალოგი აწარმოოს.

მიმდინარე წლის 20 თებერვალს საქართველოს საგარეო საქმეთა სამინისტროში განაცხადეს, რომ 2019 წლის ოქტომბერში საქართველოში კიბერშეტევა რუსეთის შეიარაღებული ძალების გენშტაბმა განახორციელა.

საქართველოში მასშტაბური კიბერშეტევა 2019 წლის 28 ოქტომბერს განხორციელდა. პრობლემები შეექმნა ასობით საიტს, მათ შორის, საქართველოს პირველი არხის ვებპორტალს და შიდა ქსელს. დროებით შეფერხდა საქართველოს რადიოს მაუწყებლობა. ასევე, გაითიშა რამდენიმე ტელევიზია და სხვადასხვა ვებპორტალი.

კიბერშეტევა განხორციელდა საქართველოს პრეზიდენტის ადმინისტრაციის ვებგვერდზეც. ვებგვერდების გახსნისას ექსპრეზიდენტ მიხეილ სააკაშვილის ფოტო გაჩნდა, წარწერით – „მე დავბრუნდები“ (I’ll be back).

საქართველოს შინაგან საქმეთა სამინისტრომ სხვადასხვა ვებგვერდზე განხორციელებულ კიბერშეტევაზე გამოძიება 284-ე და 286-ე მუხლებით დაიწყო, რაც კომპიუტერულ სისტემაში უნებართვო შეღწევასა და კომპიუტერული მონაცემების ან/და კომპიუტერული სისტემის ხელყოფას გულისხმობს.