აქტუალური
ახალი კომპანია საწვავის ფასებზე გავლენას ვერ მოახდენს
ქართულ ნავთობბაზარზე კომპანია „სან ოილ ჯორჯიას“ სახით ახალი მოთამაშე გამოჩნდა, რომელმაც „მაგნატისა“ და „სენტას“ ავტოგასამართი სადგურების ქსელი შეიძინა. გარდა ამისა, „გალფის“ ბრენდით კომპანიამ უკვე გახსნა რამდენიმე ახალი ავტოგასამართი სადგური თბილისში. კომპანიის შესახებ სხვა ინფორმაციის მოპოვება შეუძლებელია. გასაიდუმლოებულია მისი დამფუძნებლების ვინაობაც. კულუარული ინფორმაციით კი, კომპანია „სან ოილი“ ებრაელ ბიზნესმენებს ეკუთვნით, რომლებსაც საქართველოში დავით კეზერაშვილი ლობირებს.
დღეს საქართველოში 700-მდე ბენზინგასამართი სადგურია, რომელთა დაახლოებით 47% ცნობილ ბრენდებს – „ვისოლს“, „ლუკოილს“, „სოკარს“, „რომპეტროლს“, „სენტას“, „მაგნატს“ – ეკუთვნით. თუ ახალმა კომპანიამ „სენტასა“ და „მაგნატის“ ყველა სადგური შეინარჩუნა, გამოდის, რომ საცალო ბაზარზე 10%-ზე მეტს უკვე აკონტროლებს, რაც დასაწყისისთვის საკმაოდ მაღალი მაჩვენებელია.
აქედან გამომდინარე, შეიძლება ითქვას, ბაზარზე კიდევ ერთი მსხვილი მოთამაშე შემოდის, რომელიც არსებულ კომპანიებს კონკურენციას გაუწევს. თუმცა, ექსპერტების აზრით, მომხმარებელს საწვავზე ფასის შემცირების მოლოდინი არ უნდა ჰქონდეთ, რადგან ნავთობკომპანიები კარტერული გარიგებებით მუშაობენ.
