აქტუალური
ენგურჰესი 20 იანვარს მუშაობას შეწყვეტს

 საქართველო, 19 იანვარი, საქინფორმი. საქართველოს ყველაზე მძლავრი ჰიდროელექტროსადგურის „ენგურჰესის გვირაბში სარემონტო სამუშაოები 20 იანვარს ღამის 12 საათზე დაიწყება, ნათქვამია კომპანია Engurhesi–ს განცხადებაში.

დერივაციური (ჰიდროტექნიკური) გვირაბის დაგეგმილი სამუშაოები 1 მაისამდე გაგრძელდება. ამის გამო „ენგურჰესის“ ხუთივე აგრეგატი გამოირთვება.

„პროექტში თავიდანვე, 70-იანი წლებიდანვე ჩადებული იყო ყოველ 5 წელიწადში ერთხელ ენგურჰესის გვირაბის დაცლა, მდგომარეობის შეფასება, საჭირო და აუცილებელი სამუშაოების ჩატარება. ბოლო რემონტი 2006 წელს ჩატარდა, მას შემდეგ თითქმის 15 წელი გავიდა. 2018 წელს მოხდა გვირაბის ინსპექტირება, მოვნიშნეთ ადგილები, რომელთაც სჭირდებათ რემონტი და საიდანაც, სავარაუდოდ, ხდება წყლის გაჟონვა, რაც ელექტროენერგიის დანაკარგებს იწვევს", - განაცხადა „ენგურჰესის“ დირექტორთა საბჭოს თავმჯდომარე ლევან მებონიამ.

მისი თქმით, ელექტროენერგიის ყოველწლიური დანაკარგი 200–250 მლნ კილოვატ საათს შეადგენს. რემონტის შედეგად დანაკარგი დაახლოებით 100 მილიონი კვტ/სთ–ით, ანუ 30–40%–ით შემცირდება.

ჰესის მუშაობის შეჩერების შესახებ კომენტარისას ეკონომიკის მინისტრმა ნათია თურნავამ აღნიშნა, რომ ეს საქართველოს ენერგოსისტემას არ დააზარალებს, რადგან ამ პერიოდში სეზონური გამომუშავება მინიმალურია – დაახლოებით 500 მლნ კვტ–სთ.

როგორც უფრო ადრე Sputnik–საქართველოს ჰესის დირექტორმა გია ხუბუამ განუცხადა, არის იმის ალბათობა, რომ, თუ სამუშაოები არ დაიწყება, მაშინ წყლის გაჟონვის გამო ჰესის მუშაობის შეჩერება დაუგეგმავად მოუწევთ.

გასული წლის თებერვალში ცნობილი გახდა, რომ „ენგურჰესის“ რემონტისთვის ევროპის რეკონსტრუქციისა და განვითარების ბანკი (EBRD) საქართველოს 28 მლნ ევროს ოდენობის კრედიტს გამოუყოფს. კრედიტი 15 წლის ვადით გაიცემა და აქედან 3,5 წელი შეღავათიანი პერიოდია.

კრედიტის საერთო თანხა, რომელსაც EBRD რემონტისთვის გამოყოფს, 100 მლნ დოლარს ჭარბობს, ამ თანხის დიდი ნაწილი სადგურის ჰიდროაგრეგატების რემონტსა და აღდგენას მოხმარდა.

„ენგურჰესი" 1961-1978 წლებში შენდებოდა. ენგურჰესი ჰიდროელექტროსადგურების კასკადია, რომელშიც შედის თვით ენგურჰესი, რომლის დადგმული სიმძლავრეა 1300 ათ. კვტ, ვარდნილჰესი №1 (სიმძლავრე 220 ათ. კვტ) და სამი 40 ათ. კვტ სიმძლავრის ჰესი. ენგურჰესის თაღოვან კაშხალს, რომელიც ყველაზე მაღალია მსოფლიოში ამ ტიპის დამბებს შორის, მინიჭებული აქვს ეროვნული მნიშვნელობის კულტურის ძეგლის სტატუსი.