მთავარი პროკურატურის ანტიკორუფციულმა დეპარტამენტმა შპს „ნუგეშის“ დირექტორი და დამფუძნებელი გიორგი სიბაშვილი დააკავა, რომელმაც სახელმწიფოსგან თანხა ჰემოფილიით დაავადებულთათვის მედიკამენტების შესაძენად მიიღო, თუმცა წამლებს ის ხელოვნურად გაზრდილი ღირებულებით აბარებდა და მოგებას ითვისებდა.

2000-2010 წლებში საქართველოს შრომის ჯანმრთელობისა და სოციალური დაცვის სამინისტროს სახელმწიფო პროგრამის ფარგლებში ჰემოფილიით დაავადებულ ბავშვთა და მოზრდილთა უზრუნველსაყოფად თანხა გამოიყო 10 500 000 ლარის ოდენობით და „საქართველოს ჰემოფილიისა და დონორობის ასოციაციას“ გადაეცა. ასოციაციამ კი ამ თანხიდან 6 900 000 ლარის მედიკამენტების მიწოდებაზე ხელშეკრულება შპს „ნუგეშთან“ გააფორმა.

გამოძიებით დადგინდა, რომ „ნუგეშის“ დირექტორი ოპერაციებს სამი უცხოური ფირმის (იტალიური „KEDRION SPA“, ჩინური „RARE ANTIBODY ANTIGEN SUPPLY, INC“ და ამერიკული „TALECRIS HEALTH CARE LLC“) საშუალებით ახორციელებდა. სიბაშვილი საქართველოში მედიკამენტების იმპორტირებისას აყალბებდა შემოტანილი პროდუქციის ინვოისებს და საბაჟო დეკლარაციებში ხელოვნურად გაბერილი ფასები შეჰქონდა, რითაც ზრდიდა მედიკამენტების ღირებულებას. სანაცვლოდ კი, ზემოაღნიშნული ფირმები თანხებს სიბაშვილის ანგარიშებზე რიცხავდა ქართულ ბანკებში.

გასული 10 წლის განმავლობაში სახელმწიფო პროგრამის ფარგლებში გამოყოფილი 6 900 000   ლარიდან  სიბაშვილმა 1 700 000 ლარი მიითვისა.