geflag
საზოგადოება
Freedom House: „მედია საქართველოში „ნაწილობრივ თავისუფალი“ რჩება

freedomFreedom House-ს მსოფლიო პრესის თავისუფლების ყოველწლიურ კვლევაში საქართველოს რეიტინგი გაუმჯობესდა, თუმცა ქვეყანა კვლავ „ნაწილობრივ თავისუფალის“ კატეგორიაში რჩება.

196-დან თითოეულ ქვეყანას ან ტერიტორიას 0-დან 100-მდე ქულა ენიჭება, სადაც 0-დან 30-მდე ქულის მქონე ქვეყნებს ენიჭებათ სტატუსი „თავისუფალი“; 31-დან 60-მდე – „ნაწილობრივ თავისუფალი“ და 61-დან 100-მდე – „არათავისუფალი“.

2 მაისს გამოქვეყნებულ კვლევაში, რომელიც 2010 წლის პერიოდს მოიცავს, საქართველო 118-ე ადგილზეა 55 ქულით. 2009 წლის ანალოგიურ კვლევაში საქართველოს 126-ე ადგილი ეკავა 59 ქულით.

Freedom House-მ ბოლო კვლევაში საქართველოს მდგომარეობის გაუმჯობესება დაუკავშირა „უკეთეს პოლიტიკურ გარემოს, რასაც შედეგად მოჰყვა ჟურნალისტების სამართლებრივი და ფიზიკური დევნის შემცირება, ოფიციალური ცენზურის ნაკლები შემთხვევები და საზოგადოებრივი მაუწყებლის მიერ ინფორმაციის უფრო დაბალანსებული გაშუქება“.