აქტუალური
შეხვედრა აშშ-საქართველოს სტრატეგიული პარტნიორობის ქარტიის ფარგლებში

aSS_2საქართველოს საგარეო საქმეთა სამინისტროს ინფორმაციით, 2011 წლის 10 მაისს ქ. ვაშინგტონში გაიმართა აშშ-საქართველოს სტრატეგიული პარტნიორობის ქარტიის ფარგლებში ეკონომიკის სამუშაო ჯგუფის რიგით მე-4 შეხვედრა. მხარეებმა განიხილეს ეკონომიკის, ვაჭრობისა და ენერგეტიკის სფეროში თანამშრომლობის საკითხები და კონკრეტული წინადადებები სამომავლო ერთობლივი პროექტებისათვის.

ქართული დელეგაცია უწყებათაშორისი სამუშაო ჯგუფისაგან შედგებოდა და მას პრემიერ-მინისტრის მთავარი მრჩეველი საგარეო-ეკონომიკურ საკითხებში თამარ კოვზირიძე, საგარეო საქმეთა მინისტრის მოადგილე სერგი კაპანაძე და ეკონომიკისა და მდგრადი განვითარების მინისტრის მოადგილე ირაკლი მატკავა ხელმძღვანელობდნენ.

ამერიკული მხრიდან შეხვედრის თანათავმჯდომარეები იყვნენ ეკონომიკის, ენერგეტიკისა და ბიზნესის საკითხებში აშშ-ის სახელმწიფო მდივნის თანაშემწე უილიამ კრაფტი და აშშ-ის საერთაშორისო განვითარების სააგენტოს ადმინისტრატორის თანაშემწის მოადგილე რობერტა მაჰოუნი.