სამართალი
ნათელაშვილი საქართველოს შსს-ზე საერთაშორისო სანქციების დაწესებას ითხოვს
„ლეიბორისტული პარტიის“ ლიდერმა შალვა ნათელაშვილმა თანაპარტიელებთან ერთად დღეს, 9 ივნისს, შს სამინისტროსთან საპროტესტო აქცია გამართა, სადაც სამინისტროს ქმედებებზე ისაუბრა და აღნიშნა, რომ ამ „შენობაში მკვლელობათა სამინისტროა განთავსებული“.
„აქ სხედან სააკაშვილის ჯალათები, რომლებიც მზად არიან, საკუთარი ხალხის სისხლი დალიონ საკუთარი მდგომარეობისა და ბატონობის უზრუნველსაყოფად. ქართველი ხალხი გაიმარჯვებს მაშინ, როდესაც ამ შენობაზე გამარჯვების დროშა აფრიალდება“, – განაცხადა ნათელაშვილმა, რომელმაც მან აშშ-სა და ევროკავშირს მოუწოდა, მინისტრ მერაბიშვილსა და მის თანამოაზრეებზე ისეთი სანქციები გაატარონ, როგორი სანქციებიც ბელარუსის სამართალდამცავ სტრუქტურებზე დაწესდა.
ამასთან, მან ევროკავშირისა და დემოკრატიული სახელმწიფოების შინაგან საქმეთა მინისტრებს მოუწოდა, ხელი არ ჩამოართვან საქართველოს შინაგან საქმეთა მინისტრს.
