აქტუალური
ეროვნული ბანკის განაკვეთი ისევ 8 პროცენტზე რჩება
საქართველოს ეროვნულმა ბანკმა უკვე მეოთხე თვეა, მონეტარული პოლიტიკის განაკვეთი, 22 ივნისის გადაწყვეტილებით, უცვლელად, 8 პროცენტზე დატოვა.
წლიური ინფლაცია მაისში 14.3 პროცენტამდე გაიზარდა.
მონეტარული პოლიტიკის კომიტეტის შეხვედრის შემდეგ გავრცელებულ განცხადებაში ნათქვამია, რომ წლის ბოლოსთვის ინფლაცია 8 პროცენტამდე შემცირდება.მონეტარული პოლიტიკის კომიტეტის განცხადებით, სურსათისა და ენერგომატარებლების გამოკლებით საბაზო ინფლაციის მაჩვენებლები „კვლავ დაბალია“ და 1.7 პროცენტს შეადგენს. „შედეგად მოთხოვნის მხრიდან ინფლაციის რისკები მცირეა“, – ნათქვამია განცხადებაში.
„2011 წლის პირველ კვარტალში ეკონომიკის რეალური ზრდა წინა კვარტლებთან შედარებით შენელდა და 5.8 პროცენტს გაუტოლდა, რაც მოთხოვნის ზრდის ტემპის შემცირებაზე მიუთითებს“, – იტყობინება მონეტარული პოლიტიკის კომიტეტი.
