საქართველო, 27 სექტემბერი, საქინფორმი. კანადის პარლამენტში უკრაინელი ნაცისტის მიწვევის სკანდალის ფონზე კანადის პარლამენტის სპიკერი ენტონი როტა თანამდებობიდან გადადგა.

მოკლე განცხადებაში სპიკერმა მადლობა გადაუხადა პარლამენტარებს ნდობისთვის, კანადის თემთა პალატის სპიკერად არჩევისთვის წინა და მიმდინარე მოწვევებზე.

„დამძიმებული გულით ვატყობინებ წევრებს თანამდებობიდან გადადგომის შესახებ“, – აღნიშნა როტამ და გადაწყვეტილების მიზეზი არ დაუზუსტებია.

ენტონი როტას კოლეგებმა და მთავრობის წევრებმა გადადგომისკენ მას შემდეგ მოუწოდეს, რაც გაირკვა, რომ მან 98 წლის იაროსლავ ჰუნკა გასულ კვირას, ზელენსკის კანადაში ვიზიტის დროს პარლამენტში მიიწვია.

როტამ ის წარადგინა, როგორც მეორე მსოფლიო ომის ვეტერანი, რომელიც რუსების წინააღმდეგ იბრძოდა და მას გმირი უწოდა. მოგვიანებით ჟურნალისტებმა აღმოაჩინეს, რომ ჰუნკა მსახურობდა მე-14 ვაფენ-ესეს-ის გრენადიერთა დივიზიაში, რომელიც ასევე ცნობილი იყო, როგორც გალიციის დივიზია. ეს იყო მოხალისეთა დანაყოფი, რომელიც ძირითადად ეთნიკური უკრაინელებისგან იყო დაკომპლექტებული და ნაცისტების მეთაურობით მოქმედებდა.

მანამდე კანადის პრემიერ-მინისტრმა, ჯასტინ ტრუდომ ამ შემთხვევას უკიდურესად უხერხული ფაქტი უწოდა.

1tv.ge