საქართველო, 28 ნოემბერი, საქინფორმი. მიმდინარე წლის 27-28 ნოემბერს საქართველოს საგარეო საქმეთა მინისტრი ილია დარჩიაშვილი გაემგზავრება ვატიკანის ქალაქ-სახელმწიფოში, სადაც, საქართველოს დელეგაციასთან ერთად, მონაწილეობას მიიღებს ივერიის ღვთისმშობლის მოზაიკის ინაუგურაციის ცერემონიაში. ინფორმაციას საგარეო უწყება ავრცელებს.

მათივე ცნობით, ისტორიულ ცერემონიაში, საქართველოს საგარეო უწყების ხელმძღვანელთან ერთად, მონაწილეობას მიიღებენ ვატიკანის ქალაქ-სახელმწიფოს მმართველი კარდინალი ფერნანდო ვერჯეს ალძაგა, წმინდა საყდარში საქართველოს ელჩი ქეთევან ბაგრატიონ-მუხრანბატონი და საქართველოს საპატრიარქოს დელეგაცია, რომელიც მოზაიკას აკურთხებს.

„აღსანიშნავია, რომ ვატიკანის წმინდა მიწაზე ქართული მოზაიკური ფრესკა პირველად აღიმართება. წმინდა საყდართან საქართველოს საელჩომ, საქართველოს საგარეო საქმეთა სამინისტროსა და საქართველოს საპატრიარქოსთან ერთად, ვატიკანის ტერიტორიაზე ქართული მოზაიკის განთავსების საკითხზე ინტენსიური მუშაობა 2022 წლიდან განაახლა.

მოზაიკურ პანოზე ივერიის ღვთისმშობლის გამოსახვის გადაწყვეტილება მიღო საქართველოს საპატრიარქოს ხუროთმოძღვრების, ხელოვნებისა და რესტავრაციის ცენტრმა, რომელსაც თავად პატრიარქი ხელმძღვანელობს. ფრესკის ავტორი ცნობილი ქართველი ფერმწერი მოზაიკოსი ამირან ბაკურაძეა“, – აღნიშნულია საქართველოს საგარეო საქმეთა სამინისტროს მიერ გავრცელებულ ინფორმაციაში.