აქტუალური
ფქვილი გაიაფდა, თუმცა პური ისევ ძველ ფასს ინარჩუნებს
ბოლო სამი თვის განმავლობაში მსოფლიო ბაზარზე ხორბლის ფასი თანდათან შემცირდა, რაც განპირობებულია კარგი მოსავლის მოლოდინითა და რუსეთის მხრიდან ემბარგოს გაუქმებით. ხორბლის ფასი დაახლოებით 20-25%-ით შემცირდა. შესაბამისად, უკრაინიდან, რუსეთიდან და ყაზახეთიდან იმპორტირებული ხორბალი საქართველოში უფრო იაფად შემოდის. ფქვილის ფასმაც 20%-ით დაიკლო. რამდენიმე თვის წინათ ერთი ტომარა ფქვილის ფასი 60 ლარს უახლოვდებოდა, დღეს კი მისი ღირებულება უკვე 41-42 ლარია.
სპეციალისტების აზრით, ხორბლის ფასის შემცირება პურის ფასზე დაახლოებით 40%-ით აისახება, რადგან პურის წარმოებისთვის საჭიროა ელექტროენერგია, მას სხვა ხარჯებიც ემატება. თუ ხორბლის ფასმა 20%-ით მოიკლო, პურის ფასი 10%-ით მაინც უნდა შემცირდეს. თუმცა ქართულ ბაზარზე წარმოებისთვის საჭირო პროდუქციის გაიაფება პროდუქტზე ისე მყისიერად არ აისახება, როგორც გაძვირება. აქედან გამომდინარე, ხორბლის გაიაფების მიუხედავად, პურზე ფასები ჯერ არ შემცირებულა. როგორც მეხორბლეთა ასოციაციაში აცხადებენ, დღეისთვის წისქვილკომბინატები, ძირითადად, ძვირადშეძენილ ხორბალს ამუშავებენ. როგორც კი ხორბალი და ფქვილი ახალი ფასით შემოვა, პური 5 თეთრით მაინც გაიაფდება.
საქინფორმი
