პარტიის დამფუძნებლები და საინიციატივო ჯგუფის წევრები საქართველოს ფარგლებს გარეთ მცხოვრები ქართველი ბიზნესმენები არიან. როგორც საინიციატივო ჯგუფში განმარტავენ, პარტიის სახელწოდებასა და სლოგანზე მსოფლიოში ცნობილი პიარკომპანია მუშაობს, რომელმაც საქართველოში უკვე დაასრულა კვლევითი სამუშაოები. ახალი პარტიის შექმნის ერთ-ერთი ინიციატორი და დამფუძნებელი რუსეთში მოღვაწე ბიზნესმენი მინდია გულუაა, რომელიც გასულ კვირას, სტამბულში ქართული საზოგადოების ერთ ჯგუფს შეხვდა და სწორედ ახალი პარტიის შექმნის შესახებ ისაუბრა.

როგორც შეხვედრის ერთ-ერთმა მონაწილემ, კინორეჟისორმა ლევან ანჯაფარიძემ განაცხადა, პარტია 2012 წლის საპარლამენტო არჩევნებში გეგმავს მონაწილეობის მიღებას. ახალი პარტიის საგარეო პოლიტიკური ვექტორი კვლავ ევროსტრუქტურებთან მჭიდრო ინტეგრაციისკენ იქნება მიმართული. გაგრძელდება ამერიკის შეერთებულ შტატებთან მჭიდრო პარტნიორული ურთიერთობა. ამასთან, პარტია თავის ამოცანად რუსეთსა და სხვა მეზობელ სახელმწიფოებთან კეთილმეზობლური ურთიერთობის, ვაჭრობისა და ეკონომიკის აღდგენას დაისახავს.

სტამბულში გამართულ შეხვედრაზე მინდია გულუამ მოკლედ ისაუბრა პარტიის სამომავლო გეგმებზე და აღნიშნა, რომ ახლად შექმნილი პარტია თავის რიგებში სუფთა ბიოგრაფიისა და მაღალპროფესიული სტანდარტის მქონე ლიდერებსა და რიგით წევრებს გააერთიანებს, რომელთა სახელები არ ასოცირდება ადრინდელ პოლიტიკურ მარცხსა და ინსინუაციებთან.