საქართველო, 21 ოქტომბერი, საქინფორმი. საქართველოს შინაგან საქმეთა მინისტრმა გელა გელაძემ და ისრაელის სახელმწიფოს ეროვნული უსაფრთხოების მინისტრმა იტამარ ბენ-გვირმა უწყებებს შორის თანამშრომლობის მემორანდუმს მოაწერეს ხელი. ამის შესახებ ინფორმაციას შინაგან საქმეთა სამინისტრო ავრცელებს.

გელა გელაძე ისრაელის სახელმწიფოში დელეგაციასთან ერთად ოფიციალური ვიზიტით იმყოფება. ქართულ დელეგაციას ისრაელის სახელმწიფოს ეროვნული უსაფრთხოების მინისტრი იტამარ ბენ-გვირი მასპინძლობს.

უწყების ცნობით, აღნიშნული მემორანდუმი ხელს შეუწყობს საქართველოს შინაგან საქმეთა და ისრაელის სახელმწიფოს ეროვნული უსაფრთხოების სამინისტროებს შორის არსებული საპოლიციო თანამშრომლობის გაფართოებას სხვადასხვა მიმართულებით, მათ შორის, ორივე ქვეყნის მიგრაციის დეპარტამენტებსა და პოლიციის აკადემიებს შორის მოხდება სამუშაო გამოცდილების გაცვლა და თანამშრომლობის კიდევ უფრო გაღრმავება.

ორმხრივი შეხვედრის ფარგლებში მინისტრებმა სამართალდამცავ უწყებებს შორის არსებული თანამშრომლობის აქტუალური საკითხები განიხილეს. განსაკუთრებული ყურადღება გამახვილდა მხარეთა შორის გამოცდილებისა და საუკეთესო პრაქტიკის გაზიარების კუთხით მიმდინარე და სამომავლო ღონისძიებებზე.