თბილისი, 3 სექტემბერი, საქინფორმი. ივლისში მოსახლეობამ დასუფთავების მოსაკრებლის გადასახადი ახალი ტარიფით მიიღო. 2011 წლის ივნისში საკრებულოს სხდომაზე, როცა ტარიფის ზრდას ოპოზიციონერების არგუმენტების წინააღმდეგ კბილებით იცავდნენ და ამართლებდნენ „პოზიციონერები“, თბილისის მერის მოადგილე ტარიელ ხიზანეიშვილი სოციალურად დაუცველებს საკმაოდ შეღავათიან გადასახადს დაჰპირდა. „250 ათასი ოჯახი, თვეში, თითოეული 200 კვტ სთ-მდე ელექტროენერგიას ხარჯავს. მათგან 81 ათასზე მეტი – 50 კვტ სთ ელექტროენერგიას. ამ და სოციალურად გაჭირვებული 100 ათას ქულაზე ნაკლების მქონე ოჯახებისთვის დასუფთავების გადასახადი შემცირდება. შესაბამისად, მოსაკრებელი გაძვირდება მხოლოდ თბილისის მოსახლეობის 25 პროცენტისთვის“.

სხდომაზე 34 ხმით 8-ის წინააღმდეგ დამტკიცებული ახალი სისტემის გადასახადით, დასუფთავების ტარიფი თბილისის მოსახლეობისთვის ყოველ დამწვარ კილოვატ ელექტროენერგიაზე 5 თეთრი იქნებოდა. ამასთან, ხიზანეიშვილის ინიციატივით, ამგვარი ფორმულირება არ უნდა შეხებოდა თვეში საშუალოდ 50-100 კვტ-ით მოსარგებლე აბონენტს, ამასთან, სოციალურად დაუცველებსაც სხვა გაანგარიშებით უნდა მოსვლოდათ გადასახადი.

წარმოდგენილი ფოტომასალა აშკარად წინააღმდეგობაშია მოცემულ დაპირებებთან – აქ არც 100 კილოვატამდე შეღავათია გათვალისწინებული და არც სოციალურ ბაზაში რეგისტრირება 100 ათასი ქულის ქვემოთ. როგორც ხედავთ, მაჩვენებელი პირდაპირაა გადამრავლებული 5 თეთრზე.