საქართველო, 19 ნოემბერი, საქინფორმი. 18 ნოემბერს (2025), საქართველოს საპატრიარქოს ესტუმრა ათონის მთის დიდი ლავრის წინამძღვარი, კათიღუმენი პროდრომი (ლავრიოტისი), ასევე ათანასე მთაწმინდელის მონასტრის ბერები – მონოზონი აგათონი (ლავრიოტისი) და წმინდა ანას სკიტის, წმინდა ელეფთერის კელიის მღვდელმონოზონი ხრისტოდულე (კაპეტასი). ისინი საქართველოში მომლოცველობითი მისიით იმყოფებიან.

სტუმრებს შეხვდნენ:

სრულიად საქართველოს კათოლიკოს-პატრიარქის ტახტის მოსაყდრე, მიტროპოლიტი შიო (მუჯირი);

კათოლიკოს-პატრიარქის ქორეპისკოპოსი, ახალციხისა და ტაო-კლარჯეთის მიტროპოლიტი თეოდორე (ჭუაძე);

საქართველოს საპატრიარქოს საგარეო საქმეთა განყოფილების თავმჯდომარე, მიტროპოლიტი გერასიმე (შარაშენიძე);

საქართველოს საპატრიარქოს ქონების მართვის ხელმძღვანელი, მიტროპოლიტი ანდრია (გვაზავა) და სხვა სასულიერო პირები.

შეხვედრა წარიმართა ქრისტესმიერი ძმური სიყვარულის ატმოსფეროში.

ხაზგასმით აღინიშნა, რომ დედით ქართველი ათანასე ათონელის ლოცვა-კურთხევით ქართველმა ათონელმა მამებმა, დააარსეს ივერთა მონასტერი (Ιερά Μονή των Ιβήρων), Xს-ში, რომელიც საუკუნეების განმავლობაში რჩება ორ ეკლესიათა შორის დიდი და ძმური ისტორიული კავშირის ნიშანსვეტად; ითქვა ისიც, რომ ჩვენს დროში მისი უწმინდესობისა და უნეტარესობის, სრულიად საქართველოს კათოლიკოს-პატრიარქის ილიაII-ის ძალისხმევით საფუძველი ჩაეყარა ათონის მთასთან ურთიერთობებს, რომელიც ყოველწლიურად ღრმავდება.

შევნიშნავთ, რომ სტუმრები საქართველოში 22 ნოემბრამდე დარჩებიან და მოილოცავენ ჩვენი ქვეყანის ეპარქიებში არსებულ სიწმინდეებს, ტაძრებსა და მონასტრებს;

პარასკევს, მთავანგელოზობას კი საზეიმო წირვას აღასრულებენ დარიალის მთავარანგელოზთა ტაძარში.