საქართველო, 15 დეკემბერი, საქინფორმი. საქართველო მშვიდობიანი პოლიტიკის ერთგულია და სთავაზობს ყველას სამხრეთ კავკასიაში ნეიტრალურ სივრცეს, განაცხადა საქართველოს პრემიერ-მინისტრმა ირაკლი კობახიძემ თურქმენეთში საერთაშორისო ფორუმის „მშვიდობა და ნდობა: მიზნების ერთობლიობა მდგრადი მომავლისთვის“ პლენარულ სესიაზე.

საერთაშორისო ფორუმი მშვიდობისა და ნდობის საერთაშორისო წელს ეძღვნება, რომელიც თურქმენეთის უწყვეტი ნეიტრალიტეტის 30 წლის იუბილესთან დაკავშირებით იმართება.

„ვხელმძღვანელობთ მშვიდობიანი პოლიტიკის მკაფიო ორიენტირით და ვცდილობთ, წვლილი შევიტანოთ რეგიონულ სტაბილურობაში დიალოგისთვის ნეიტრალური და საიმედო სივრცის შეთავაზებით სამხრეთ კავკასიაში“, - განაცხადა პრემიერ-მინისტრმა ირაკლი კობახიძემ.

მისი თქმით, საქართველომ წამოიწყო დისკუსიები, რომლებიც მიზნად ისახავს მეზობლებს შორის დაძაბულობის შემცირებას და საკომუნიკაციო არხების შექმნას.

„წამოვიწყეთ და ხელი შევუწყვეთ დისკუსიებს, რითაც ვადასტურებთ ერთგულებას მეტად სტაბილური და თანამშრომლობაზე ორიენტირებული რეგიონული გარემოს ხელშეწყობისადმი. საქართველო კვლავაც სრულად ერთგულია პარტნიორებთან თანამშრომლობის იდეისადმი, რათა მშვიდობისა და ნდობის საერთაშორისო წლის იდეალები კონკრეტულ და ხანგრძლივ პროგრესად გარდაიქმნას“, - განაცხადა მთავრობის მეთაურმა.

მისი თქმით, მდგრადი მომავალი მოითხოვს როგორც დიალოგს, ისევე ქმედებას.

„ერთად ჩვენ შეგვიძლია მეტად უსაფრთხო, სტაბილური და მდგრადი მომავლის შექმნა მომავალი თაობებისთვის“, - განაცხადა კობახიძემ.

ამასთან, პრემიერმა მშვიდობის საქართველოს ხედვა წარმოადგინა.

„ვხელმძღვანელობთ მდგრადი მშვიდობის მკაფიო ხედვით; ქვეყანა სტაბილურად აგრძელებს განვითარებას და ინარჩუნებს მაკროეკონომიკურ სტაბილურობას, აღწევს შთამბეჭდავ ზრდას და ავლენს განსაკუთრებულ ეკონომიკურ მდგრადობას. ეს მიღწევები პირდაპირ ასახავს მთავრობის სახელმძღვანელო სტრატეგიას: მშვიდობა ქმნის პროგნოზირებადობას, ხოლო პროგნოზირებადობა, თავის მხრივ ქმნის საფუძველს მდგრადი ეკონომიკისთვის“, - განაცხადა კობახიძემ.

მისი თქმით, საქართველო რამდენიმე წლის განმავლობაში ეკონომიკური ზრდის სტაბილურ ტენდენციას ინარჩუნებს.

„მოსალოდნელია, რომ მაღალი ეკონომიკური ზრდის ტენდენცია მომდევნო წლებშიც გაგრძელდება, რასაც მაღალი რეპუტაციის მქონე საერთაშორისო ფინანსური ინსტიტუტების შეფასებები ადასტურებს“, - განაცხადა პრემიერ-მინისტრმა.

მისი თქმით, საქართველო არის რეგიონული თანამშრომლობის აქტიური ხელშემწყობი, რომელიც რეგიონში ფიზიკურ და დიპლომატიურ ხიდებს აშენებს.

„აზიისა და ევროპის დამაკავშირებელი შუა დერეფანი ამ ხედვის ცენტრალურ ნაწილს წარმოადგენს“, - აღნიშნა მან.

მისი თქმით, შუა დერეფანი ეს არის ნდობის დერეფანი, რომელიც აკავშირებს ადამიანებს, ბიზნესს და კულტურებს მთელი კონტინენტის მასშტაბით.

მშვიდობისა და ნდობის საერთაშორისო წელი გენერალური ასამბლეის 78-ე სესიაზე თურქმენეთის ინიციატივით გამოცხადდა. შესაბამის რეზოლუციას 86 ქვეყანამ დაუჭირა მხარი. ინიციატივის მიზანია ერებს შორის დიალოგისა და თანამშრომლობის გაძლიერება.

თურქმენეთი კონსტიტუციით გამყარებული ნეიტრალური სტატუსის მქონე ქვეყანაა. ეს სტატუსი პირველად საერთაშორისო დონეზე 1995 წელს იქნა აღიარებული. 2017 წელს, აშხაბადის ინიციატივით, გაეროს გენერალურმა ასამბლეამ მიიღო რეზოლუცია, რომლითაც 12 დეკემბერი ნეიტრალიტეტის საერთაშორისო დღედ გამოცხადდა.