თბილისი, 15 სექტემბერი, საქინფორმი. პრემიერ ნიკა გილაურის განცხადებით, საქართველო „დამატებით ასობით მილიონი დოლარის ინვესტიციას“ მიიღებს საერთაშორისო ბირჟებზე სტრატეგიული სახელმწიფო კომპანიების მინორიტარული პაკეტების დაგეგმილი განთავსების შედეგად.

პარლამენტმა 13 სექტემბერს პრივატიზაციის ახალი ფორმის შემოღების მიზნით პირველი მოსმენით მიიღო ცვლილებები კანონმდებლობაში, რომელიც სახელმწიფო კომპანიების აქციათა შეუზღუდავი პაკეტების საერთაშორისო ბირჟებზე გაყიდვას ითვალისწინებს. ოპოზიციამ აღნიშნული ინიციატიცა გააკრიტიკა იმ მოტივით, რომ ეს ნაბიჯი სტრატეგიულ ობიექტებზე სახელმწიფოს კონტროლის დაკარგვას გამოიწვევს.

„საქართველოს მთავრობა არც ახლა და არც მომავალში არ აპირებს ამ კომპანიების საკონტროლო პაკეტების გასხვისებას“, – განაცხადა გილაურმა მთავრობის სხდომაზე.

„ჩვენი მიზანია, საერთაშორისო ბირჟებზე სტრატეგიული კომპანიების მინორიტარული პაკეტების 20, 25, 30 პროცენტის განთავსება. არცერთ შემთხვევაში 49%-ზე მეტი არ განთავსდება“, – აღნიშნა მან.

მისი თქმით, მთავრობის მიზანია, ამ ტრანსაქციებით საქართველოში შემოვიდეს დამატებით „ასობით მილიონი დოლარის ინვესტიცია“.

„თუ ეს ყველა ტრანსაქცია შესრულდება უახლოესი თვეების განმავლობაში, ნახევარ მილიარდ  დოლარზე მეტი ინვესტიცია შემოვა“, – განაცხადა ნიკა გილაურმა.

იმ კომპანიებს შორის, რომლის აქციების განთავსებასაც მთავრობა საერთაშორისო ბირჟებზე გეგმავს, არიან „საქართველოს რკინიგზა“, „საქართველოს ელექტროსისტემა“, ნავთობისა და გაზის კორპორაცია, რომელიც ჩრდილოეთ-სამხრეთის მაგისტრალურ გაზსადენს მართავს და რომლითაც საქართველოს გავლით სომხეთი გაზს რუსეთიდან იღებს.