საქართველო, 2 სექტემბერი, საქინფორმი. 2026 წლის 30 სექტემბერს, საქართველოში ვიზიტის გაგრძელებისას, მოსკოვის საპატრიარქოს საგარეო საეკლესიო კავშირების განყოფილების თავმჯდომარემ, ვოლოკოლამსკის მიტროპოლიტმა ანტონიმ და მისმა თანმხლებმა პირებმა ქალაქ თბილისის სიწმინდეები მოინახულეს.

რუსეთის მართლმადიდებელი ეკლესიის სტუმრები ეწვივნენ წმინდა სამების სახელობის საკათედრო ტაძარს, რომელიც ნეტარხსენებული კათოლიკოს-პატრიარქის ილია II-ის ინიციატივით აშენდა.

შემდეგ სსკგ-ის თავმჯდომარემ და მისმა თანმხლებმა პირებმა გადაინაცვლეს ყოვლადწმინდა ღვთისმშობლის მიძინების უძველეს სიონის საკათედრო ტაძარში, სადაც ვოლოკოლამსკის მიტროპოლიტმა ანტონიმ ახალქალაქის, კუმურდოსა და კარის მიტროპოლიტ ნიკოლოზთან ერთად, მოსკოვისა და სრულიად რუსეთის პატრიარქის მრჩევლის, დეკანოზ ნიკოლოზ ბალაშოვისა და სსკგ-ის თავმჯდომარის მოადგილის, დეკანოზ იგორ იაკიმჩუკის თანამსახურებით, მიცვალებულის ლიტია (პანაშვიდი) გადაიხადა უწმინდესისა და უნეტარესის კათოლიკოს-პატრიარქის ილია II-ის საფლავთან. ღვთისმსახურებას ესწრებოდნენ სიონის ტაძრის წინამძღვარი, პროტოპრესვიტერი გიორგი ზვიადაძე და საქართველოში შვეიცარიის კონფედერაციის საელჩოსთან არსებული რუსეთის ფედერაციის ინტერესთა სექციის ხელმძღვანელი დ.ა. ოლისოვი. მეუფე ანტონიმ ასევე თაყვანი სცა ტაძარში დაბრძანებულ სიწმინდეებს: მოციქულთასწორი ნინოს სასწაულთმოქმედ ჯვარსა და წმინდა იოანე მანგლელის წმინდა ნაწილებს.

შემდეგ სსკგ-ის თავმჯდომარე, გორისა და ატენის მიტროპოლიტ ანდრიასა და ახალქალაქის, კუმურდოსა და კარის მიტროპოლიტ ნიკოლოზის თანხლებით, თბილისში კეთილმორწმუნე დიდი მთავრის ალექსანდრე ნეველის სახელობის რუსულ ტაძარს ეწვია, სადაც მას თბილად მიესალმა წინამძღვარი, დეკანოზი ბიძინა გუნია. რუსეთის მართლმადიდებელი ეკლესიის დელეგაციის წევრებმა თაყვანი სცეს ღირსი ზინობის, სქემაში სერაფიმეს (თეთრიწყაროელი მიტროპოლიტის), და მისი მოსწავლის, სქემარქიმანდრიტ ვიტალის (სიდორენკო) საფლავებს.

საქართველოს საპატრიარქოს შენობაში ვოლოკოლამსკის მიტროპოლიტი ანტონი მიიღო საქართველოს მართლმადიდებელი ეკლესიის მეთაურმა, სრულიად საქართველოს უწმინდესმა და უნეტარესმა კათოლიკოს-პატრიარქმა შიო III-მ.

შეხვედრაში, რომელმაც თბილ და გულითად ვითარებაში ჩაიარა, რუსეთის მართლმადიდებელი ეკლესიის მხრიდან ასევე მონაწილეობდნენ დეკანოზი ნიკოლოზ ბალაშოვი და დეკანოზი იგორ იაკიმჩუკი, დეკანოზი ვლადიმერ ალექსანდროვი და სსკგ-ის თავმჯდომარის მდივანი მღვდელი ნიკოლოზ ვასინი. საქართველოს მართლმადიდებელი ეკლესიის მხრიდან მონაწილეობდნენ: ახალციხისა და ტაო-კლარჯეთის მიტროპოლიტი თეოდორე, ზუგდიდისა და ცაიშის მიტროპოლიტი გერასიმე, გორისა და ატენის მიტროპოლიტი ანდრია, ნიკორწმინდელი ეპისკოპოსი ვახტანგი, პროტოპრესვიტერი გიორგი ზვიადაძე, საქართველოს საპატრიარქოს თანამშრომლები დეკანოზი მიქაელ ბოტკოველი და დეკანოზი ანდრია ჯაღმაიძე.

ვოლოკოლამსკის მიტროპოლიტმა ანტონიმ საქართველოს მართლმადიდებელი ეკლესიის მეთაურს გადასცა ძმური სალამი და კეთილი სურვილები მოსკოვისა და სრულიად რუსეთის უწმინდესი პატრიარქის კირილესგან. თავის მხრივ, უწმინდესმა პატრიარქმა შიომ მადლობა გადაუხადა რუსეთის მართლმადიდებელი ეკლესიის დელეგაციას სტუმრობისთვის და აღნიშნა ვიზიტის მნიშვნელობა ეკლესიათაშორისი ურთიერთობების განმტკიცების საქმეში. საუბრისას განიხილეს ორი ეკლესიის ძმური თანამშრომლობის საკითხები, აგრეთვე საერთომართლმადიდებლური მნიშვნელობის თემები. შეხვედრის დასასრულს გაიმართა საჩუქრების გაცვლა.

წყარო: https://patriarchia.ru/