საქართველო, 30 ოქტომბერი, საქინფორმი. მოსკოვში გამართული მრგვალი მაგიდის - „რუსეთის რუსები და ქართველები: ხალხთა ერთიანობა, თანამემამულეთა მხარდაჭერა და კულტურული მემკვიდრეობის შენარჩუნება“ მონაწილეებმა ხელი მოაწერეს რეზოლუციას, რომელიც რუსეთსა და საქართველოს შორის ჰუმანიტარული, ეკონომიკური და კულტურული კავშირების გაღრმავების ინიციატივებს მოიცავს.

დოკუმენტი ითვალისწინებს მიმართვას რუსეთის პრეზიდენტ ვლადიმერ პუტინისა და საქართველოს მთავრობისადმი ორმხრივი ურთიერთობების განვითარების წინადადებებით.

ფორუმის ფარგლებში დაფუძნდა ფონდი „რუსებისა და ქართველების ერთობა“. ფონდის თავმჯდომარის, პარტია „სოლიდარობა მშვიდობის სახელით“ საერთაშორისო მდივნის მამუკა ფიფიას განცხადებით, მთავარი ამოცანაა რუსეთსა და საქართველოს შორის დიპლომატიური ურთიერთობების აღდგენის ხელშეწყობა და განზრახვებიდან პრაქტიკულ ქმედებებზე გადასვლა.

„ქართველები წარმოდგენილნი არიან განათლების, მედიცინის, მეცნიერების, კულტურისა და სპორტის სფეროებში. თუმცა, პოლიტიკურ ცხოვრებაში ინტეგრაცია არ არის. ქართველები ძალიან ნიჭიერი ხალხია და ჩვენმა წინაპრებმა ეს არაერთხელ დაამტკიცეს. ქართველების მეტი ინტეგრაცია რუსეთის ცხოვრების ყველა სფეროში კარგ შედეგებს მოიტანს“, - განაცხადა ფიფიამ.

მიღებულ რეზოლუციაში აღნიშნულია, რომ საკითხის გადაწყვეტა ორივე ქვეყნის ხელმძღვანელობის პოლიტიკურ ნებაზეა დამოკიდებული, საზოგადოებრივ ორგანიზაციებს კი შეუძლიათ დიალოგის წარმართვა და ადამიანებს შორის კონტაქტების შენარჩუნება. რეზოლუცია ასევე მოიცავს წინადადებებს საქართველოში რუსული ენის შესწავლის ხელშეწყობის, რუსულ-ქართული უნივერსიტეტის დაფუძნებისა და ლომისის წმინდა გიორგის ტაძარში მსახურების აღდგენის შესახებ.