თბილისი, 3 ნოემბერი, საქინფორმი. როგორც ცნობილია, რამდენიმე თვის წინათ სამართალდამცველებმა ჯაშუშობის ბრალდებით რამდენიმე ფოტოგრაფი დააკავეს, რომელთაგან ერთ-ერთი გიორგი აბდალაძე გახლდათ. რამდენიმე დღის განმავლობაში, მიუხედავად მასზე განხორციელებული ზეწოლისა, ფოტოგრაფს ბრალი არ უღიარებია და ის გარკვეული პერიოდის განმავლობაში შიმშილობდა კიდეც. მოგვიანებით, მას შემდეგ, რაც ფოტოგრაფს მაინც აიძულეს აღიარებითი ჩვენების მიცემა, მას პირობითი სასჯელი მიუსაჯეს და სასამართლო დარბაზიდან გაათავისუფლეს ფულადი ჯარიმის გარეშე. მისი თხუთმეტდღიანი სამართლებრივი დევნა ისევე მოულოდნელად დასრულდა, როგორც დაიწყო.

ამ ფაქტმა საერთაშორისო საზოგადოება ძალზე აღაშფოთა. თვით ამერიკის შეერთებული შტატების ელჩი საქართველოში ჯონ ბასი ყურადღებით აკვირდებოდა  „ფოტოგრაფების საქმეს“. მრავალი საერთაშორისო ორგანიზაციის მიერ ეს ერთმნიშვნელოვნად შეფასდა როგორც თავისუფალ მედიაზე ზეწოლის ფაქტი.

და აი, გუშინ, საქინფორმისთვის ერთი მეტად საინტერესო ინფორმაცია გახდა ცნობილი – ლონდონის მერიამ ფოტოგრაფ გიორგი აბდალაძის მხარდაჭერის ნიშნად, არც მეტი, არც ნაკლები, ლონდონის ცენტრში, ერთ-ერთ ძველ ქუჩას, რომელიც ძალიან ჰგავს ძველი თბილისის ქუჩებს, მისი სახელი მიანიჭა – „ABDALE ROAD“ (იხ. ფოტო).

"შეუძლებელია!" - იფიქრებს მავანი და აბსოლუტურად მართალიც იქნება, თუმცა... დღეს ყველაფერი შესაძლებელია. ბიზნესმენ ივანიშვილთან ხელის ჩამორთმევით დამშვიდობებაც კი ტყვიაგაუმტარი შუშის მიღმა, რომელიც, ზოგიერთი ჟურნალისტის მტკიცებით, ორი დღის წინანდელ პრესკონფერენციაზე ყოფდა მათ პოლიტიკაში მოსული ბიზნესმენისგან...