პოლიტიკა
ჯიოევას მომხრეებმა ინაუგურაცია 10 დეკემბერს დაგეგმეს

storonniki-jioevaთბილისი, 5 დეკემბერი, საქინფორმი. ალა ჯიოევას მომხრეების განცხადებით, არჩეული პრეზიდენტის ინაუგურაცია 10 დეკემბერს, 14:00 საათზე, გაიმართება. ინფორმაციის სესახებ რუსეთის საინფომაციო სააგენტოები იუწყებიან.
აღნიშნული განცხადება ჯიოევას მომხრეებმა გუშინ ცხინვალში მიმდინარე მიტინგზე გააკეთეს. მათი თქმით, მიუხედავად იმისა, რომ უმაღლესმა სასამართლომ არჩევნების შედეგები გააუქმა, არჩეული პრეზიდენტის ინაუგურაცია მაინც შედგება. ისინი არ აკონკრეტებენ, სად რა ვითარებაში გაიმართება აღნიშნული ღონისძიება.
მანამდე სააგენტოსთან საუბარში ჯიოევას საარჩევნო შტაბის ხელმძღვანელმა მიხეილ ხანიკაევმა განაცხადა, რომ ინაუგურაცია ცხინვალის ერთ-ერთ მთავარ მოედანზე ჩატარდება, სადაც შტაბის წარმომადგენლებს ათი ათასამდე მომხრის შეკრება სურთ.

კვირას ცხინვალში მიიღეს მიმართვა გაეროს, ევროპარლამენტისა და ზოგი ქვეყნის ხელმძღვანელთა მიმართ, რომელშიც სთხოვენ მათ სიტუაციაში ჩარევას, რათა აღიკვეთოს მოსალოდნელი არეულობა. თუმცა ალა ჯიოევა ირწმუნება, რომ რუსეთის წინააღმდეგ არ წავა და კონფლიქტის ძალისმიერი მეთოდით გადაწყვეტას არ დაუშვებს. „ზოგიერთები ამბობენ, თითქოს ჩვენ სტრასბურგში და კიდევ სადღაც ვიჩივლებთ, მაგრამ ჩვენ ასეთი გეგმები არ გვაქვს. ამ დროისთვის სხვადასხვა ვარიანტს ვიხილავთ, რათა საზოგადოების ყურადღება მივიპყროთ. რუსეთის წინააღმდეგ არავითარ შემთხვევაში არ წავალთ. ჩვენ რუსეთის წინააღმდეგ არ ვართ განწყობილი“, – ამბობს ჯიოევა.

„ხალხმა თავისი სახალხოდ არჩეული პრეზიდენტის ინაუგურაციის ჩატარება გადაწყვიტა და ეს ქმედება, ალბათ, უფრ პოლიტიკური იქნება, ვიდრე სახელმწიფოებრივი“, – განაცხადა ჯიოევას შტაბის ხელმძღვანელმა მიხაილ ხანიკაევმა.

მისივე თქმით, ინაუგურაციის ცერემონიალი ქალაქის ერთ-ერთ მოედანზე უნდა გაიმართოს. იქნება მრავალი ადამიანი, რომლებიც ალა ჯიოევას პრეზიდენტად გამოაცხადებენ.
თავად ალა ჯიოევა ამ დროისათვის თავს ისევ შეუძლოდ გრძნობს, თუმცა აცხადებს, რომ მას ხალხთან გასვლა სურს. „ისინი უკვე მესამე დღეა, ყინვაში დგანან, მე ვღელავ მათზე“, – აცხადებს ჯიოევა. ხალხთან მოედანზე ჯიოევას ნდობით აღჭურვილი პირი ანატოლი ბარანკევიჩი იმყოფება.