რელიგია
პატრიარქი კიდევ 565 ჩვილს მონათლავს

patriarqi-natloba1თბილისი, 18 იანვარი, საქინფორმი. როგორც ცნობილია, 3 წლის წინათ სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი, უწმიდესი და უნეტარესი ილია მეორე ქვეყანაში დემოგრაფიული მდგომარეობის გაუმჯობესების მიზნით გამოვიდა ინიციატივით, რომ ჯვარდაწერილი ოჯახების მესამე და შემდეგ შვილებს თავად მონათლავდა. ჩვილთა პირველი საყოველთაო ნათლობა ყოვლადწმიდა სამების საპატრიარქო ტაძარში 2008 წლის 19 იანვარს შედგა. საქართველოს ეკლესიის მეთაური უკვე 10 400-მდე ბავშვის ნათლიაა.

ტაძარი ამჯერად 21-ე ნათლობისთვის ემზადება, რისთვისაც ჩვილთა რეგისტრაცია საქველმოქმედო ფონდ „ლაზარეში“ 25-27 დეკემბერს მიმდინარეობდა.

როგორც საპატრიარქოს ახალგაზრდულ ცენტრ „ძლევაიში“ განმარტავენ, ჩვილთა 21-ე ნათლობა მიმდინარე წლის 19 იანვარს, ნათლისღების დღესასწაულზე, ყოვლადწმიდა სამების საკათედრო ტაძარში გაიმართება.

პატრიარქის ნათლულებს საჩუქრად ნათლობის მოწმობა, სანთლები და „ცხოვრების წიგნი“ გადაეცემათ. ნათლობა სამებაში დღის მეორე ნახევარში დაიწყება, უწმინდესი ტაძარში ნათლობის დასრულების შემდეგ მიბრძანდება და თავის ნათლულებს დალოცავს. ილია მეორე მათ ახლობლებს მცირე ქადაგებითაც მიმართავს.