ამერიკის თავდაცვის მდივანმა ავღანეთში ქართველი სამხედროები მოინახულა
თბილისი, 15 მარტი, საქინფორმი. ამერიკის შეერთებული შტატების თავდაცვის მდივანმა ლეონ პანეტამ ავღანეთში სამშვიდობო მისიით მყოფი ქართველი სამხედროები მოინახულა.
საქართველოს თავდაცვის სამინისტროს ცნობით, პენტაგონის ხელმძღვანელი ჰელმანდის პროვინციაში ქართულ სამხედრო ბაზა „შუკვანს“ ესტუმრა. აშშ-ის თავდაცვის მდივანმა ქართველ სამხედროებს ავღანეთში „ISAF“-ის სამშვიდობო მისიაში მონაწილეობისთვის მადლობა გადაუხადა. მან 31-ე მსუბუქი ქვეითი ბატალიონის სამხედრო მოსამსახურეებს სიტყვით მიმართა და ავღანეთში დაჭრილი ვიცე-პოლკოვნიკის – ალექსანდრე ტუღუშის, წერილი წაუკითხა. „ჩემთვის დიდი პატივი იყო თქვენთან ერთად მსახურება. თქვენ ქართველი გმირები ხართ...
საქართველოს შეიარაღებულ ძალებს საერთაშორისო ძალებთან ერთად ავღანეთის მისიაში დიდი წვლილი შეაქვს. ამერიკელ სამხედროებთან ერთად ავღანეთის ყველაზე ცხელ რეგიონში სამშვიდობო მისიის შესრულება დიდი პატივია. მე ვერ შევძელი თქვენთან ერთად მისიის დასრულება, მაგრამ ძალიან მეამაყებით – თქვენ ხართ გმირები, რომლებიც საქართველოს ისტორიაში შეხვალთ“, – ნათქვამია წერილში.
31-ე ბატალიონის სამხედრო მოსამსახურეები ავღანეთში სამშვიდობო მისიას 2011 წლის ნოემბრიდან ასრულებენ. ქართველი ჯარისკაცები „ISAF“-ის (საერთაშორისო უსაფრთხოების უზრუნველყოფის ძალები) მისიის ფარგლებში ჰელმანდის პროვინციაში ამერიკული კონტინგენტის შემადგენლობაში მსახურობენ.
