აქტუალური
რუსეთის საგარეო უწყების კომენტარი საქართველოში რუსული გემის დაკავების თაობაზე
თბილისი, 20 მარტი, საქინფორმი. რუსეთის საგარეო საქმეთა სამინისტროს ოფიციალური წარმომადგენლის – ალექსანდრ ლუკაშევიჩის განცხადებით, საქართველოში შვეიცარიის საელჩოს რუსეთის ინტერესების დაცვის სექცია საქართველოში რუსული მშრალტვირთმზიდის დაკავების გარემოებებს სწავლობს. სამინისტროს ვებგვერდზე გამოქვეყნებული კომენტარის თანახმად, ლუკაშევიჩი აცხადებს, რომ რუსეთის მოქალაქეებს, რომლებიც გემის ბორტზე იმყოფებოდნენ, ასევე, გაეწევა საკონსულო დახმარება.
ლუკაშევიჩის ინფორმაციით, გემი მაშინ დააკავეს, როდესაც თურქეთის პორტ ხოფაში უნდა შესულიყო და შესაბამის ნებართვას ელოდებოდა.
როგორც საქინფორმი იუწყებოდა, საქართველოს შს სამინისტროს სასაზღვრო პოლიციის თანამშრომლებმა რუსეთის დროშით მცურავი ტვირთმზიდი „PUR-NAVOLOK“ გუშინ ნაოსნობის წესების დარღვევისთვის დააკავეს. ეკიპაჟი 10 წევრისგან შედგება. ყველა მათგანი რუსეთის მოქალაქეა. გემის კაპიტნის, რუსეთის ფედერაციის მოქალაქე იური დანილოვის მიმართ წინასწარი გამოძიება მიმდინარეობს.
