აქტუალური
მცირე და საშუალო საწარმოთა ასოციაციის კვლევების პრეზენტაცია
თბილისი, 24 აპრილი, საქინფორმი. საქართველოს მცირე და საშუალო საწარმოთა ასოციაცია დღეს სასტუმრო „Radisson Blu Iveria“-ში პროექტის – „ბიზნესისათვის მეგობრული ჩარჩო კანონმდებლობის მხარდაჭერა საქართველოში“ – ფარგლებში ჩატარებული კვლევების პრეზენტაციას გამართავს . კვლევების სახელწოდებაა „საგადასახადო დავების გადაწყვეტის ეფექტური ინსტიტუტები, საგადასახადო სასამართლოები და ალტერნატიული გზები“ და „გადასახადისგან თავის არიდება და სისხლისსამართლებრივი პასუხისმგებლობა, შედარებითი ანალიზი“.
ღონისძიება მიზნად ისახავს კვლევის შედეგების ფართო საზოგადოებისათვის გაცნობას, შენიშვნებისა და წინადადებების განხილვას აღნიშნულთან დაკავშირებით და საბოლოოდ ჩამოყალიბებული კონცეფციის კანონმდებლებისთვის წარდგენას.
პრეზენტაციას დაესწრებიან აღმასრულებელი და საკანონმდებლო ხელისუფლების, საერთაშორისო და არასამთავრობო ორგანიზაციების წარმომადგენლები.
პროექტი დაფინანსებულია ევრაზიის თანამშრომლობის ფონდის მიერ „სამოქალაქო ინიციატივა დამოუკიდებელი მართლმსაჯულებისათვის“ პროექტის ფარგლებში და ხორციელდება შეერთებული შტატების საერთაშორისო განვითარების სააგენტოსა (USAID) და აღმოსავლეთ-დასავლეთის მართვის ინსტიტუტის (EWMI) მხარდაჭერით.
